Feluleiksstjórarnir í IKEA ófundnir

Hátt í 300 krakkar mættu til þess að taka þátt í feluleik í IKEA í dag. Þar á meðal var þó hvergi að finna feluleiksstjórana þær Ellen Rosdahl og Megan Dunley. Samkvæmt tilkynningu ætluðu þær að setja reglur, stjórna leiknum og skipta í hópa.

Þjónustustjóri IKEA bað því krakkana að skipta sér í hópa sjálf og svo földu þau sig og þeirra leitað um allt hús. Leikurinn stóð yfir í um eina og hálfa klukkustund og fór mjög vel fram.

Að leik loknum verðlaunaði IKEA svo alla krakkana með nammi og ís fyrir góða framkomu.

„Við söknuðum þess þó verulega að þær Ellen og Megan skildu ekki láta sjá sig því þær höfðu mikið fyrir því að hvetja krakkana til að koma. En það má segja að þær séu eflaust meistarar í feluleik enda ófundnar enn,“ segir í tilkynningu frá IKEA.

Fyrr í vikunni kynnti blaðamaður mbl.is sér bestu felustaðina í IKEA. Það er aldrei að vita hvort að þær Ellen og Megan leynist á einhverjum þeirra.

Fyrri frétt mbl.is:

10 frábærir felustaði í IKEA

1.100 manns ætla að fela sig í IKEA

Blaðamaður mbl.is rannsakaði felustaði í IKEA fyrr í vikunni. mbl.is/Eggert

• 1 blogg um fréttina

Bloggað um fréttina

• Jens Guð: Týndir feluleikstjórar