Það er ekki á hverjum degi að hágæðahljómsveitir sem eru á hátindi ferils síns heimsæki landið líkt og gerist í byrjun næsta mánaðar þegar breska sveitin alt j treður upp í Vodafone-höllinni. Síðastliðið haust gaf sveitin út plötuna This is all yours sem kom í kjölfarið á An Awsome wave sem kom út árið 2012 en sú kom sveitinni á kortið með hvelli og hlaut hún Mercury verðlaunin eftirsóttu fyrir hana, enda alger öndvegisskífa sem meðlimir sveitarinnar nostruðu við í fimm ár fyrir útgáfu.
Alt j, sem á rætur að rekja til Leeds, hefur skapað sér frumlegan hljóm og ákveðna sérstöðu í landslagi indí-tónlistar sem hefur einkennst af offramboði á undanförnum áratug þar sem gítarbönd hafa verið á undanhaldi. Sérstakur söngstíll Joe Newmans, óvenjuleg uppbygging á lögum og óreiðukenndur hljóðheimur þar sem ólík áhrif blandast hefur heillað hlustendur um allan heim og hefur útgáfa síðari plötu sveitarinnar gengið vel, var t.d. tilnefnd til Grammy-verðlauna. Í kjölfar útgáfu á This is all yours fyllti sveitin m.a. Madison Square Garden í New York nú er sveitin á stóru tónleikaferðalagi í Ástralíu þar sem Ásgeir og félagar sjá um upphitun.
Í takt við annað sem hefur verið að gerast í þessari tegund tónlistar eru meðlimir alt j tilþrifalitlar rokkstjörnur, eiginlega hálfgerðir nördar, Millistéttar-Bretar sem kynntust í listakóla og semja lög um ólíklega hluti. Lagið Taro fjallar t.a.m. um stríðsljósmyndarana og parið Robert Capa og Gerdu Taro sem kvöddu þennan heim með dramatískum hætti: hann steig á jaðrsprengju í Indó-Kína en hún varð undir skriðdreka í spænsku borgarastyrjöldinni. Í The Gospel of John Hurt er fjallað um frægt atriði úr kvikmyndinni Alien þegar frekar andstyggileg geimvera brýtur sér leið úr brjóstkassa samnefnds leikara með tilheyrandi óþægindum.
Fyrir þá sem ekki hafa prufað að slá inn alt j á lyklaborðið verður niðurstaðan ∆ en þríhyrningar hafa verið þeim félögum nokkuð hugleiknir og nú er sveitin orðin að tríói þó þeir séu fleiri á sviðinu þegar sveitin kemur fram á tónleikum. Áður en This is all yours kom út sagði Gwil Sainsbury skilið við sveitina þar sem flökkulífið átti ekki við hann. Þá er líf og ferill Tom Green, trymbils sveitarinnar, í mikilli óvissu þar sem hann er með sjaldgæfan sjúkdóm sem veldur því að hann hefur tapað stórum hluta heyrnar sinnar og þurfti að fara í nýrnaígræðslu.
Meðlimir sveitarinnar eru ekki þekkt andlit og hafa náð að selja vel á aðra milljón platna án þess að reiða sig á frægðina, svipað og landar þeirra í sveitunum Radiohead og Pink Floyd tókst að gera.
Tónleikarnir í Vodafone-höllinni verða þó ekki þeir fyrstu sem sveitin hefur haldið hér á landi því, ef sagan er sönn sem þeir sögðu í viðtali við Guardian fyrir ári síðan, kom sveitin fram í einkapartýi hjá rússneskum fjarskiptarisa sem haldið var hér á landi fyrir einhverjum árum síðan. Sagan sem er nokkuð safarík segir að gestir hafi verið íklæddir víkingabúningum, rækilega ölvaðir og nokkuð ágengir.
Breezeblocks er líklega stærsti smellur alt j til þessa.