Myndskeið af hnerrandi litlum, munaðarlausum broddgöltum hefur farið sem eldur í sinu um netið. Mögulega hnerra þeir þegar smá dropi af naglalakki er settur á bak þeirra til aðgreiningar.
„Þetta er hnerri, eða kannski hiksti, að minnsta kosti er þetta mjög sætt,“ heyrist dýralæknirinn segja á myndskeiðinu. Og það eru orð að sönnu.
Broddgeltirnir þrír fundust einir og yfirgefnir í kofa og var komið til starfsmanna Wildlife Aid á Bretlandseyjum.
Talið er að styggð hafi komið að móðurinni er hún fæddi litlu krílin í kofanum. Talið er að þeir hafi verið um sólarhrings gamlir er þeir komust í hendur dýraverndunarsamtakanna.