Fyrrverandi lögmaður Michael Jackson, Brian Oxman, segir söngvarann hafa verið miður sín eftir húsleitina sem gerð var á heimili hans árið 2003.
Söngvarinn var sakaður um að brjóta kynferðislega á börnum, og var í kjölfarið gerð húsleit á heimili hans. Jackson var sýknaður af öllum ákæruliðum tveimur árum síðar.
Undanfarna daga hefur þó mikið verið fjallað um áður óséða lögregluskýrslu sem gerð var í tengslum við húsleitina, en þar kemur meðal annars fram að fundist hafi ljósmyndir og myndbönd af körlum, konum og börnum í kynferðislegum stellingum ásamt lyfjum sem notuð eru til að meðhöndla kynlífsfíkn.
Frétt mbl.is: Nýtt myndband af húsleit skýtur upp kollinum
Í kringum 70 starfsmenn saksóknara og lögreglustjóra framkvæmdu húsleitina á sínum tíma, en Oxman segir söngvarann hafa brostið í grát eftir að henni lauk.
„Lögreglan skildi við húsið í algerri ringulreið, en hann hreyfði ekki við neinu í mörg ár. Hann vildi ekki snerta neitt. Hann sagði: „allir mínir verðmætu munir og safngripir hafa verið snertir og eyðilagðir.“
Líkt og fram kemur í frétt Mirror greindi Oxman frá því að Jackson hefði upp frá þessu sofið í gestahúsinu, því hann gæti ekki fengið af sér að dveljast í svefnherbergi sínu lengur.