Framleiðendur James Bond myndanna vilja að Daniel Craig haldi áfram sem njósnari hennar hátignar. „Craig er fyrsta valið, ekki spurning,“ sagði Callum McDougall, einn aðalframleiðandi myndanna í samtali við BBC Radio 4 í morgun. Þetta kemur fram í frétt BBC.
Síðan að Craig tók við kyndlinum árið 2006 hefur hann túlkað hlutverk njósnarans í fjórum kvikmyndinum: Casiono Royale, Quantum of Solace, Skyfall og Spectre.
Frétt mbl.is: Daniel Craig hafnaði 12,4 milljörðum
Fyrr á árinu sagði Craig að hann hefði ekki áhuga á að taka hlutverkið að sér að nýju. Á hann að hafa hafnað tilboði upp á 12,4 milljarða króna um að leika í tveimur myndum til viðbótar. Síðan þá hefur mikið verið rætt um mögulega arftaka leikarans og hafa nöfn á borð við Tom Hiddleston, Tom Hardy, Idris Elba og Angelina Jolie verið nefnd í því samhengi.
Frétt mbl.is: Leikaravalið ekki lýðræði
McDougall, sem komið hefur að níu myndum um herra Bond, sagðist í viðtalinu óska að hann vissi hver yrði næsti James Bond. En eitt væri á hreinu, ef að Daniel Craig snérist hugur yrði hlutverkið hans.