Leikaravalið ekki lýðræði

Valið á leikurum í næstu kvikmynd um njósnara hennar hátignar, James Bond, verður ekki byggt á lýðræði sagði leikstjórinn Sam Mendes á hátíðinni Hay Festival í gær, en hann hefur leikstýrt síðustu tveimur myndum um njósnarann. Hvað sem liði vangaveltum um það í fjölmiðlum hver tæki við aðalhlutverkinu af leikaranum Daniel Craig væri það framleiðandinn, Barbara Broccoli, sem að lokum tæki ákvörðun um það.

„Það er linnulaus umræða í fjölmiðlum um það hver verði næsti Bond. Staðreyndin er sú, og hér er fyrirsögn: Þetta er ekki lýðræði. Þetta er ekki X-Factor, þetta er ekki þjóðaratkvæði, þetta eru ekki kosningar. Barbara Broccoli ákveður hver verður næsti Bond. Þannig er það bara,“ er haft eftir Mendes á fréttavef breska ríkisútvarpsins BBC.

Mendes hefur áður lýst því yfir að hann muni ekki leikstýra næstu Bond-myndinni en hann leikstýrði bæði Skyfall og Spectre. Craig mun ekki leika njósnarann aftur.

Daniel Craig sem njósnari hennar hátignar. AFP

• Blogga um frétt