Tónlistarmaðurinn Bob Dylan mun hugsanlega halda tónleika í Stokkhólmi næsta vor. Þetta segir meðlimur sænsku Nóbelsverðlaunanefndarinnar.
„Þá hefur hann mjög gott tækifæri til að halda fyrirlesturinn sinn,“ sagði Sara Danius í viðtali við sænska útvarpsstöð.
Þess eina sem krafist er af Nóbelsverðlaunahafa er að hann haldi fyrirlestur. Það þarf að gerast innan sex mánaða frá afhendingu verðlaunanna 10. desember.
Nóbelsverðlaunanefndin tilkynnti á miðvikudaginn að Dylan ætlaði ekki að vera viðstaddur afhendingu Nóbelsverðlaunanna vegna annarra skuldbindinga.
Frétt mbl.is: Dylan tekur ekki á móti verðlaununum
Tilkynningin kom ekki á óvart. Dylan, sem er 75 ára, sagði ekki eitt aukatekið orð opinberlega daginn sem tilkynnt var að hann myndi hljóta Nóbelsverðlaunin í bókmenntum. Lengi vel var einnig óljóst hvort hann yrði viðstaddur verðlaunaathöfnina.