Enska hljómsveitin The xx ætlar að halda tónlistarhátíðina Night + Day við Skógafoss í júlí næstkomandi.
Hátíðin stendur yfir helgina 14. til 16. júlí.
„Við urðum ástfangin af Íslandi þegar við tókum þar upp hluta af [plötunni]„I See You“ fyrir nokkrum árum og við hlökkum mikið til að snúa þangað aftur með vinum okkar. Vonumst til að sjá ykkur þar!“ segir í færslu sveitarinnar á Facebook.
Miðasala á tónlistarhátíðina hefst á föstudaginn. Á meðal annarra flytjenda sem koma fram á hátíðinni eru Warpaint, Gangly, Högni og Mr. Silla.
The xx var stofnuð í London árið 2005. Fimm árum síðar vann hljómsveitin hin virtu Mercury-verðlaun í Bretlandi fyrir sína fyrstu plötu.
Platan I See You, sem var að hluta til tekin upp hér á landi, kom út í janúar síðastliðnum.