Kensington-höll tilkynnti að Katrín og Vilhjálmur ættu von á sínu þriðja barni eftir að Katrín þurfti að aflýsa plönum sínum vegna morgunógleði. Hertogaynjan fær alltaf mjög mikla morgunógleði á meðgöngu.
Samkvæmt Daily Mail glímir Katrín við eitthvað sem um eitt prósent kvenna glímir við og kallast á fræðimáli Hyperemesis Gravidarum (HG) en það einkennist af gífurlega mikilli ógleði og uppköstum. Ólíkt venjulegri morgunógleði sem gengur yfir á fyrstu mánuðunum finna konur fyrir ógleði og æla alla meðgönguna, ekki bara á morgnana, og eiga þær oft í erfiðleikum með að halda mat og drykk niðri.
Konur með þessi einkenni eru oft og tíðum lagðar inn á sjúkrahús vegna vökvaskorts og var Katrín meðal annars lögð inn á sjúkrahús vegna ógleði þegar hún gekk með Georg.