Sópransöngkonan Kiri Te Kanawa, ein ástsælasta díva óperuheimsins, er hætt að syngja opinberlega.
„Ég vil ekki heyra rödd mína,“ segir Kiri í samtali við BBC. Ferill nýsjálensku söngkonunnar spannar yfir hálfa öld, en söngkonan varð 73 ára á þessu ári.
Kiri segir að söngur hennar á sviði tilheyri nú fortíðinni. „Þegar ég er að kenna ungum söngvurum og heyri fagrar og ferskar raddir þeirra vil ég ekki setja rödd mína samhliða þeirra.“
Kiri hefur komið fram í öllum stærstu óperuhúsum heimsins og tónleikahúsum. Hún skaust upp á stjörnuhimininn árið 1971 þegar hún söng hlutverk greifynjunnar í uppfærslu óperunnar í Covent Garden á Brúðkaupi Fígarós eftir Mozart.
„Ég hef átt magnaðan feril,“ segir Kiri, en hún var gallhörð á því að það yrði í hennar höndum að ákveða hvenær hún myndi syngja sinn svanasöng. Það tók hana hins vegar tíma að sætta sig við þá ákvörðun. Hún kom síðast fram á sviði á tónleikum í Ballarat í nágrenni Melbourne í október á síðasta ári.
Fjöldi fólks hefur hlýtt á söng Kiri síðustu fimm áratugi en aldrei hafa jafn margir séð og heyrt hana syngja og í brúðkaupi Karls Bretaprins og Díönu prinsessu árið 1981. 600 milljónir fylgdust með Kiri flytja „Let the Bright Seraphim“ eftir Handel í athöfninni.
Kiri er mikill Íslandsvinur, en hún hefur komið reglulega hingað til lands og haldið tónleika, meðal annars með Garðari Thór Cortez. Hún kom til að mynda áhorfendum í Hörpu verulega á óvart á tónleikum sínum í Hörpu í febrúar árið 2012 þegar hún flutti lagið Sveitin milli sanda eftir Magnús Blöndal. Söngkonan var yfir sig hrifin af Hörpu og sagði við áhorfendur að hún hefði nú sungið í fallegasta tónleikasal í heimi.
Kiri mun nú einbeita sér að samtökum sínum, The Kiri Te Kanawa Foundation, þar sem hún mun þjálfa framtíðarstjörnur óperuheimsins.