Skötuhjúin Harry Bretaprins og leikkonan Meghan Markle hafa farið fremur leynt með samband sitt, en þau hafa að mestu haldið því utan við sviðsljósið. Um helgina mættu þau þó (næstum) saman á opinberan viðburð, en bæði voru þau viðstödd opnunarhátíð Invictus-leikanna sem fram fór í Toronto á laugardaginn.

Parið sat þó ekki saman, því Harry sat í viðhafnarstúku ásamt fleiri fyrirmönnum svo sem Melaniu Trump, forsetafrú Bandaríkjanna, og forsætisráðherra Kanada, Justin Trudeau.

Parið virðist engu að síður hafa skemmt sér konunglega, eins og sjá má á meðfylgjandi ljósmyndum en Markle fylgdist grannt með þegar kærasti hennar hélt ræðu á setningarhátíðinni.