Star Wars: The Last Jedi var frumsýnd vestanhafs á dögunum og beið áhugafólk um kóngafólk sérstaklega eftir myndinni enda voru sögur á sveimi um að Bretaprinsarnir Vilhjálmur og Harry léku í myndinni. Nú hefur leikarinn John Boyega lýst því yfir að prinsarnir hefðu verið klipptir út úr myndinni.
Vilhjálmur og Harry áttu að hafa leikið stormsveitarmenn og vegna búningsins átti að vera nær ómögulegt að taka eftir þeim. Boyega sem leikur í myndinni staðfesti í nóvember að þeir hefðu leikið í myndinni.
Boyega sagði frá því í breskum morgunþætti samkvæmt Daily Mail að atriðið sem prinsarnir léku í hafi orðið eftir í klippiherberginu. Prinsarnir mættu á frumsýninguna í London á dögunum og segir Boyega að hann hafi beðið þá afsökunar. Hann segir að Vilhjálmur hafi svarað þannig að hann þyrfti líklega að bæta leiklistarhæfileika sína.