Spennan magnast fyrir Söngvakeppni evrópskra sjónvarpsstöðva. Þátttaka Ísraela hefur verið umdeild í ár en það virðist ekki koma niður á sigurlíkum þeirra. Ísraelar eru í fimmta sæti í veðbönkum um þessar mundir.
Eurovisionworld safnar saman vinningslíkum hjá hinum ýmsu veðbönkum og þar má finna Ísraela í fimmta sæti. Ísland sem var í áttunda sæti í gærkvöldi er á hraðri siglingu upp töfluna og er komið í það sjöunda. Framlag Ísraels hefur ekki verið valið frekar en framlag Íslands. Úkraína þykir sigurstranglegasta landið.
Í síðustu viku var staðfest að Ísrael yrði á meðal þeirra landa sem tekur þátt í keppninni í ár þrátt fyrir stríðsástand á Gasa. Fordæmi eru fyrir því að vísa löndum úr keppni. Rússum var vísað úr keppni eftir innrás Rússa í Úkraínu.
Fjöldi tónlistarfólks mótmælti þátttöku Íslands í Eurovision í ár í ljósi þess að Ísrael fékk að vera með. Stefán Eiríksson útvarpsstjóri svaraði kallinu fyrr í vikunni þegar hann sagði að tengsl milli Söngvakeppninnar og Eurovison hefðu verið rofin. Þarf sigurvegari Söngvakeppninnar ekki endilega að fara út til Malmö í maí.