Japanskur lögregluþjónn sem hefur legið á sjúkrahúsi vegna stunguáverka hefur viðurkennt að hafa veitt sér sjálfur áverkana til þess að fá veikindaleyfi í nokkra daga, samkvæmt upplýsingum frá talsmanni lögreglunnar.
Lögregluþjónninn sem un ræðir var úrvinda af vinnuálagi í kjölfar jarðskjálfta sem reið yfir Japan þann 25. mars síðastliðinn. Hann brá á það ráð að stinga sig í magann nýverið með ávaxtahníf til þess að fá nokkra daga frí frá störfum.
Lögregluþjónninn hafði umsjón með áfallateymi á vegum lögreglunnar eftir jarðskjálftann í mars. Einn lést í skjálftanum og tæplega tvö hundruð slösuðust auk þess sem um 900 byggingar skemmdust.
Talsmaður japönsku lögreglunnar sagði í samtali við AFP fréttastofuna að lögregluþjónninn hafi greint frá því að maður hafi ráðist á sig og stungið hann í kviðarholið þann 23. maí sl. Þegar hann var útskrifaður af sjúkrahúsi sl. fimmtudag viðurkenndi hann að hafa veitt sér áverkana sjálfur.