Flugfreyjur thaílenska flugfélagsins Thai Airways lögðu í dag fram formlega kvörtun við sjónvarpsstöð í landinu vegna sýninga á klámfenginni sápuóperu um flugfreyjur sem berjast um ástir flugmanna.
Krishnaratn Puranarasamriddhi, varaformaður stéttarfélags Thai Airways, sagði að í „Englastríðinu,“ eins og sápuóperan nefnist, væri alveg litið framhjá því öryggis- og þjónustuhlutverki sem flugfreyjur hefðu að gegna.
Hann sagði þættina ýkta og gefa slæma mynd af flugliðum félagsins, auk þess að vera niðrandi fyrir starfsfólk þess. Ætla áhafnir Thai Airways og Bankok Airlines að skrifa menningarmálaráðherra landsins bréf þar sem farið verður fram á að dregið verði úr dónaskapnum í þáttunum.