Breskir ferðamenn lamdir og læstir inni í skáp

Tveir breskir ferðamenn voru lamdir illilega á grísku eyjunni Krít eftir að annar þeirra ók vélhjóli inn í matvöruverslun, samkvæmt upplýsingum frá lögreglu. Þrír Grikkir voru handteknir í kjölfarið en þriggja er enn leitað.

Atvikið átti sér stað í strandbænum Malia sem er í nágrenni borgarinnar  Heraklion.

Upptökin má rekja til þess er nítján ára gamall skoskur piltur ók vélfák inn í matvöruverslunina. Urðu talsverðar skemmdir á byggingunni. Þegar hann neitaði að greiða eiganda verslunarinnar 5 þúsund evrur í skaðabætur var hann laminn og læstur inni í skáp í versluninni.

Vinur hans, sem einnig er nítján ára, kom til þess að bjarga félaga sínum en ekki vildi betur til en að hann var einnig laminn og læstur inni í skáp. Þeim var síðan sleppt og kærðu líkamsárásina í kjölfarið til lögreglu.

Segir í frétt AFP fréttastofunnar að atvik sem þessi séu ekki óalgeng milli ungra Breta sem sækja grískar eyjur heim. Oft megi rekja ástæðu deilnanna til óhóflegrar neyslu áfengis gestanna.  

• 2 blogg um fréttina

Bloggað um fréttina

• Sigríður Sigurðardóttir: Sjúkkit!
• Benedikta E: Betrunarbúðir ríkjabandalags ? Grikkirnir kunna lagið á breskum fylliröftum sem …