Grunlaus hjón hædd og niðurlægð

Yfirmenn Vilu Reef hótelsins á Maldíveyjum hafa beðið hjón afsökunar á framferði starfsmanna sem stýrðu athöfn þar sem hjónin, sem voru að endurnýja hjúskaparheitin, áttu að vera blessuð. Vegna vankunnáttu parsins í tungumálinu sættu starfsmennirnir færis til að niðurlægja þau og blóta þeim í sand og ösku.

Hótelstjórnin segir að hegðun starfsmannanna sé óafsakanleg. Athöfnin fór fram við ströndina á fallegum degi. Í stað þess að fara fögrum orðum um parið og hjónabandið úthúðuðu starfsmennirnir þeim og gerðu gróft grín að þeim á dívehí, sem er opinbert tungumál á Maldíveyjum.

„Stjórnendur hótelsins eru miður sín vegna þessarar niðurlægingar,“ segir í yfirlýsingu frá hótelinu.

Myndbandið hefur nú verið birt á YouTube. Þar sjást menn hæðast að og móðga hjónin sem eru frá Sviss. Þau eru m.a. kölluð „svín“ og  „heiðingjar“.

Hjónin brosa allan tímann og hlýða fyrirskipunum starfsmannanna.

Athöfnin stóð yfir í 15 mínútur og kostaði parið um 150.000 kr. Hjónin skiptust á hringum áður en þau plöntuðu fræi kókoshnetutrésins.

Maldíveyjar njóta mikilla vinsælda sem ferðaparadís brúðarhjóna og treysta eyjaskeggjar mjög á tekjur ferðamanna.

Ahmed Shaheed, utanríkisráðherra landsins, hefur séð myndskeiðið. Hann segist vera yfir sig hneykslaður á framferði mannanna og hefur fyrirskipað rannsókn, enda sé mikið í húfi fyrir Maldíveyjar.

„Við biðjumst innilega afsökunar á þeim skaða og þeim alvarlegu eftirköstum sem þetta atvik getur valdið ferðaþjónustunni á Maldíveyjum og ímynd landsins, landsmanna og ríkisstjórnarinnar,“ segir í yfirlýsingu frá hótelinu.

• 2 blogg um fréttina

Bloggað um fréttina

• Sigurður Haraldsson: Hvað skiptir þetta máli?
• Arngrímur Stefánsson: Þetta er ekkert miðað við Íslensk ungmenni