Kýr á flótta

Mikil leit stendur yfir að kúnni Yvonne í Bæjaralandi í Þýskalandi og hefur verið heitið 10 þúsund evrum, rúmlega 1,6 milljónum króna, í fundarlaun handa þeim sem finnur kúna.

Í frétt þýska blaðsins Bild kemur fram að Yvonne hafi sloppið af bóndabæ skammt frá Zangerg í maí. Býður Bild fundarlaun fyrir kúna eftir að yfirvöld í Bæjaralandi höfðu gefið út veiðileyfi á Yvonne þar sem hún ógnaði umferð. Ákvörðun yfirvalda var tekin í kjölfar þess að kýrin hljóp í veg fyrir lögreglubíl á sveitarvegi nýverið. Þau segja hins vegar að það að drepa kúna sé einungis neyðarráðstöfun.

Eftir að Bild birti frétt um fundarlaunin eru íbúar á svæðinu og veiðimenn upp um fjöll og firnindi að leita að kúnni í þeirri  von að vinna sér inn pening. Hefur málið gengið svo langt að dýraverndunarsamtök í Austurríki hafa boðist til þess að kaupa kúna ef hún næst á lífi.