Guðríður Guðbrandsdóttir er elst Íslendinga og heldur upp á 106 ára afmæli sitt í dag. Guðríður býr í þjónustuíbúð fyrir aldraða í Reykjavík og er vel ern. Hún fer alltaf í hádegismat og í leikfimi tvisvar í viku.
Þegar Guðríður hélt upp á afmæli sitt fyrir ári fór hún með 84 erinda þulu, Skröggskvæði, utanbókar. Hún býst þó ekki við því að hún fari með þulu á afmælinu í dag. „Ég nenni ekki neinu tilstandi,“ segir hún og vill að tekið sé fram að hún verði ekki heima hjá sér á afmælisdaginn.
Í Morgunblaðinu í dag er fjallað um ættir Guðríðar en hún fæddist á Spágilsstöðum í Laxárdal í Dölum og ólst þar upp. Hún kynntist helstu skáldum Dalamanna á fyrri helmingi aldarinnar sem leið. Hún og Stefán frá Hvítadal voru fjórmenningar. Guðríður kynntist einnig Jóhannesi úr Kötlum, sem var heimagangur á Spágilsstöðum, og Steini Steinarr sem ólst upp í Saurbænum. „Mér fannst hann nú alltaf dálítið skrýtinn,“ segir hún um Stein Steinarr.