Tilnefna Al Gore til friðarverðlauna Nóbels

Baráttan gegn loftslagsbreytingum er friðarbarátta, segja tveir norskir þingmenn sem tilnefnt hafa Al Gore, fyrrverandi varaforseta Bandaríkjanna, til friðarverðlauna Nóbels, ásamt Sheilu Watt-Cloutier, leiðtoga Inúíta í Kanada.

Þingmennirnir tveir, Børge Brende og Heidi Sørensen, leggja til að Gore og Watt-Cloutier hljóti verðlaunin fyrir viðleitni þeirra til að vekja athygli stjórnmálamanna í heiminum á hættunum sem fylgi loftslagsbreytingum.

Frá þessu greinir fréttavefur Aftenposten.

„Þetta er án efa einhver mikilvægasta viðleitnin til að koma í veg fyrir átök. Loftslagsbreytingar geta leitt til gífurlegs flóttamannastraums, meiri en nokkurntíma hefur sést í sögunni. Baráttan gegn loftslagsbreytingum er mjög mikilvægt framlag til friðar í heiminum,“ sagði Sørensen við Aftenposten.

Watt-Cloutier hefur um árabil verið einn helsti leiðtogi Heimskautaráðstefnu inúíta. Á undanförnum árum hefur hún vakið athygli á þeirri öru hlýnun sem er að verða á norðurskautssvæðinu, og lagt áherslu á að útskýra fyrir þjóðarleiðtogum að norðurskautssvæðið sé „loftvogin“ sem sýni loftslagsbreytingar.

Sheila Watt-Cloutier. mbl.is/KGA

• 2 blogg um fréttina

Bloggað um fréttina

• Ólafur Þórðarson: Seinheppni Gore mun leiða til...
• Freyr Gígja Gunnarsson: Veðrabreytingar í heiminum