Erlent | mbl | 8.9.2007 | 12:29 | Uppfært 14:05

Fannst á lífi eftir að hafa verið týnd í skóglendi í tvær vikur

Björgunarsveitarmenn sjást hér koma Doris Anderson til hjálpar sl. fimmtudag. AP

Sjötíu og sex ára gömul kona kom björgunarsveitarmönnum á óvart þegar þeir fundu hana á lífi og við góða heilsu í fjöllunum í Oregon í Bandaríkjunum. Ekkert hafði spurst til konunnar í tvær vikur og höfðu björgunarsveitarmenn gefið upp vonina að finna hana á lífi þegar hún loks fannst.

Doris Anderson var í veiðiferð ásamt Harold eiginmanni sínum þegar bifreiðin þeirra bilaði þann 24. ágúst sl.

Þrátt fyrir að hjónin væri í marga km frá mannabyggðum reyndu þau að ganga til byggða. Þau urðu hinsvegar viðskila í skógi. Þess má geta að Harold komst til byggða heill á húfi.

Fjölskylda konunnar var byrjuð að undirbúa minningarathöfn þegar lögreglan fann hana.

Konan þjáðist af vatnsskorti þegar hún loks fannst en hún náði samt að svala þorstanum í nálægum læk.

Þrátt fyrir að hún væri léttklædd þá tókst henni að lifa af kaldar nætur, en næturhitinn var oft við frostmark. Hún fékk kalsár á tærnar en hún mun ekki þurfa að gangast undir aðgerð vegna sáranna.

Læknarnir sem tóku á móti Doris segja að hún sé við óvenju góða heilsu miðað við það sem hún hefur þurft að ganga í gegnum.