Sigurinn mikilvægari en þrennan

Orri Steinn Óskarsson, hetja FC Köbenhavn í sigrinum á AGF í dönsku úrvalsdeildinni í knattspyrnu, segir að sigurinn hafi verið mikilvægari en þrennan hans, sem er hans fyrsta fyrir félagið í deildinni.

Orri kom inn á sem varamaður snemma í síðari hálfleik á Parken í gær þegar staðan var 0:0 og skoraði á 59., 85. og 88. mínútu leiksins sem endaði með sigri FCK, 3:2.

Frétt af mbl.is

Mögnuð þrenna Orra gegn AGF

„Þetta var ótrúlega sætt en það mikilvægast var að vinna leikinn," sagði Orri í viðtali við sjónvarp FCK eftir leikinn.

„Staðan var 0:0 þegar ég kom inn á og síðan fengum við hornspyrnu. Ég var upp við markið, fékk boltann og skoraði, og við það jókst sjálfstraustið verulega þannig að ég fór í rétt hugarástand. Og sem betur fer hef ég góða tilfinningu fyrir því hvar markið er,“ sagði Orri.

Frétt af mbl.is

Vinnusemi og auðmýkt borga sig

Hann er nú markahæsti leikmaður FCK í úrvalsdeildinni á tímabilinu, ásamt Roony Bardghji, en þeir hafa skorað sjö mörk hvor á meðan tveir aðrir eru með sex mörk.

Þá kemur fram á heimasíðu FCK að Orri sé fyrsti leikmaður félagsins frá árinu 1997 sem komi inn á sem varamaður og skori þrennu.

• Blogga um frétt