Foreldrar Madeleine McCann eru lögð af stað heim til Bretlands frá Portúgal en portúgalska lögreglan hefur ásakað þau um að hafa verið völd að láti Madeleine í byrjun maí. Ekkert hefur til hennar spurst síðan. Gagnrýna foreldrar Madeleine, Gerry og Kate McCann vinnubrögð portúgölsku lögreglunnar harðlega. McCann-hjónin yfirgáfu íbúð sína í Praia de Luz snemma í morgun en þau hafa dvalið þar frá hvarfi Madeleine.
Samkvæmt heimildum Sky fréttastofunnar þá eru hjónin á leið til flugvallarins í Faro þar sem ætla að fljúga til flugvallar í nágrenni heimabæjar þeirra í Leicestershire.
Samkvæmt AFP fréttastofunni hafði verið talið að þau myndu ekki yfirgefa Portúgal eftir að hafa fengið réttarstöðu grunaðra á föstudag. En heimild Sky fréttastofunnar segir að McCann hjónin hafi ákveðið að halda heim eftir að portúgalska lögreglan gaf þeim leyfi til þess að yfirgefa landið.