George W. Bush, Bandaríkjaforseti, sagði í sjónvarpsávarpi í nótt, að 5700 bandarískir hermenn yrðu komnir heim frá Írak fyrir jól og hann byggist við því, að þúsundir til viðbótar myndu snúa heim fyrir mitt næsta ár. Sagðist Bush hafa fallist á ráðleggingar Davids Petraeus, yfirmanns bandaríska heraflans í Írak, sem gaf Bandaríkjaþingi skýrslu í vikunni.
Demókratar í Bandaríkjunum, sem hafa krafist stefnubreytingar í málefnum Íraks, brugðust hart við ræðu Bush. Joe Biden, sem sækist eftir útnefningu sem forsetaefni flokksins, sagði að ræðan hefði verið skammarleg og sérkennileg.
Bush sagði í ræðu sinni, að með því að fækka smátt og smátt í bandaríska hernum væri bæði komið til móts við þá, sem vildu kalla herinn heim og þeirra, sem teldu að árangur í Írak væri nauðsynlegur til að tryggja öryggi Bandaríkjanna.
Þá sagði Bush, að það væri aldrei og seint að ráðast til atlögu gegn al-Qaeda. „Það er aldrei of seint að vinna að frelsi, Og það er aldrei of seint að styðja herlið okkar í orrustu sem það getur unnið," sagði Bush.
Harry Reid, leiðtogi demókrata í öldungadeild Bandaríkjaþings, sagði að ræðan væri sama gamla tuggan. Nancy Pelosi, forseti fulltrúadeildarinnar, sagði að ræðan boðaði 10 ára hernám Íraks og Hillary Clinton, öldungadeildarþingmaður, sagði að í ræðunni væru boðuð of stutt skref og of seint.
Jack Reed, öldungadeildarþingmaður sagði: „En einu sinni hefur forsetanum mistekist að annað hvort leggja fram trúverðuga áætlun um að ljúka stríðinu eða koma fram með sannfærandi rök fyrir því að halda stríðinu áfram."