Fox reynir að svæla Obama út úr greninu
Setja bókamerki
Bandaríska sjónvarpsstöðin Fox News hleypti í dag af stokkunum sérstökum dagskrárlið, Obamavaktinni, þar sem taldir eru þeir dagar sem liðið hafa frá því Barack Obama, forsetaframbjóðandi, lofaði að mæta í sunnudagsfréttaþátt stöðvarinnar. Það loforð hefur Obama ekki efnt enn.
Chris Wallace, sem stýrir Fox News Sunday, segir að Obama hafi lofað sér því í mars 2006 að koma í þáttinn en við það loforð hafi hann ekki staðið.
Hillary Rodham Clinton, sem keppir við Obama um forsetaefnisútnefningu demókrata, hefur komið í þáttinn að minnsta kosti tvisvar á þessu tímabili og John McCain, forsetaefni repúblikana, að minnsta kosti sex sinnum.
„Margir hafa sent okkur tölvupóst og spurt hvers vegna öldungadeildarþingmaðurinn vill ekki koma í Fox News Sunday og svara erfiðum spurningum," sagði Wallace. „Nú eru liðnir 730 dagar, 13 stundir, 53 mínútur og 9, nei 10 sekúndur, frá því Obama féllst á að mæta í Fox News Sunday. Fylgist með nýjustu fréttum í næstu viku."
Tommy Vietor, talsmaður framboðs Obama, vildi ekki segja hvers vegna þingmaðurinn hefði ekki mætt í þáttinn en benti á, að Obama hefði mætt í annan þátt á Fox stöðinni sl. föstudag.
Fox News Channel, sem er í eigu New Corp., fyrirtækis Ruperts Murdochs, segir fréttaumfjöllun sína vera réttláta og ekki draga taum neins. Frjálslyndir telja stöðina hins vegar halla undir Repúblikanaflokkinn.
Telur forsendur fyrir vaxtalækkun
Vonast til að tjaldbúðir við HÍ standi áfram
Frambjóðendur skila inn listum í Hörpu
Krefjast stöðvunar framkvæmda
Væri að ljúga ef ég segðist ekki stressaður
Mál hjúkrunarfræðingsins fer aftur fyrir héraðsdóm
„Höfum ekki náð að skríða upp úr þeirri gryfju“