Sarkozy veitir bændum 1,65 milljarða evra aðstoð

Franska stjórnin hefur orðið við kalli bænda og ákveðið að styrkja þá um sem nemur 1,65 milljarði evra. Frá þessu skýrði Nicolas Sarkozy forseti á ferð um landbúnaðahéruð í austurhluta Frakklands í gær.

Samkvæmt áætluninni verður milljón evra í formi lánafyrirgreiðslu og 650 milljónir í beinum styrkjum.

Sarkozy hvatti jafnframt Evrópubandalagslöndin (ESB) til þess að herða á reglum og eftirliti með mjólkuriðnaðinum. Hann sagði ríkisstjórn sína myndu stórherða eftirlit með kostnaðardreifingu í matvælaframleiðslu. Það væri  „óásættanlegt“ að að afurðaverð til bænda hafi lækkað um 20% á sama tíma og verðlækkun til neytenda hefur aðeins numið 1%.

Ráðstafanirnar eru ekki sagðar eiga sér fordæmi en séu nauðsynlegar vegna gríðarlegs vanda sem landbúnaður glími við vegna lækkandi afurðaverðs, vaxandi framleiðslukostnaðar og það sem Sarkozy segir ójafna afkomu í matvælaframleiðslu.

Sarkozy segir vanda landbúnaðarins ekki bara tengjast spurningunni um framleiðslu og eftirspuyrn, heldur sé um skipulagslegan vanda í matvælaframleiðslu að ræða.

Sarkozy sagði bændur vera hluta af þjóðarímynd Frakklands og landbúnaður ætti ekki síður mikla möguleika í framtíðinni og nanótækni og flugvélaiðnaður.

Dominique Barrau, framkvæmdastjóri helstu bændasamtaka Frakklands (FNSEA), segir að með ákvörðun ríkisstjórnar Sarkozy hafi mótmælaaðgerðir um land allt frá í byrjun september skilað árangri að hluta til.

„Hinar bestu áætlanir, jafnvel þótt stórar séu í sniðum, koma aldrei í stað verðstefnu,“ sagði Barrau, en megin krafa bænda hefur verið að fá verð fyrir afurðir sínar er beri uppi framleiðslukostnað.