Bernanke gagnrýnir Gordon Brown

Ben Bernanke, seðlabankastjóri Bandaríkjanna, segir að ákvarðanir sem Gordon Brown tók þegar hann var fjármálaráðherra landsins hefðu leitt til þess að Bretar hefðu ekki verið í stakk búnir að takast á við fjármálakreppuna sem skall á af fullum þunga á síðasta ári.

Bernanke segir þá ákvörðun Browns um að láta Seðlabanka Englands hætta að hafa eftirlit með bönkunum í landinu hafi haft skelfilegar afleiðingar. Vegna þessa standi breska hagkerfið frammi fyrir meiriháttar vanda.

Bandaríski seðlabankastjórinn lét ummælin falla í bandaríska þinginu og þykir málið hið vandræðalegasta fyrir Brown. Hann hefur ítrekað neitað því að ákvarðanir sem hann tók sem fjármálaráðherra hafi átt þátt í þeim efnahagsvanda sem Bretar standa nú frammi fyrir. Þetta kemur fram á vef breska blaðsins Telegraph.

Bernanke lét ummælin falla eftir að opinber úttekt á skuldum breskra skattborgara var kynnt, en þeir eru sagðir standa frammi fyrir 850 milljarða punda skuld vegna aðgerða stjórnvalda til að koma bönkunum til aðstoðar. 

„Þegar kreppan skall á - t.d þegar Northern Rock lenti í vanda - þá var Seðlabanki Englands ekki með á nótunum og gat ekki tekið á því sem reyndist svo vera skaðlegt ferli og meiriháttar vandamál fyrir breska hagkerfið,“ sagði Bernanke.

Gordon Brown, forsætisráðherra Bretlands. Reuters

• 4 blogg um fréttina

Bloggað um fréttina

• Jakob Falur Kristinsson: Arkitekt kreppunnar
• Andri Geir Arinbjarnarson: Gagnrýni Bernanke á einnig við Ísland
• Jón Pétur Líndal: Fársjúkt kerfi.
• Egill Jón Kristjánsson: Skúrkurinn fundin.