Þjóðarsorg vegna fórnarlamba skjálftans
Tíbetskir munkar taka þátt í fjöldabæn til handa fórnarlömbum skjálftans. Reuters
Þjóðarsorg verður á morgun í Kína vegna þeirra rúmlega 2.000 einstaklinga sem létust í jarðskjálfta í Qinghai-héraði Tíbet á þriðjudaginn í síðustu viku.
Jarðskjálftinn sem mældist 6.9 á richter skala hefur kostað a.m.k. 2.046 manns lífið. 190 til viðbótar er enn saknað að sögn kínverskra ríkisfjölmiðla, 12.000 hafa slasast og tugir þúsunda hafa misst heimili sín.
Kínverska ríkisstjórnin hefur hins vegar neitað að tjá sig um bón Dalai Lama, hins útlæga andlega leiðtoga Tíbeta, um að fá að heimsækja hamfarasvæðið sem er í heimahéraði hans.
Dalai Lama biðlaði fyrst til yfirvalda í Peking á laugardag um að fá að heimsækja Kína í fyrsta skipti í 51 ár og með „uppfylla óskir margra íbúa þar.“ Talsmaður kínverska utanríkisráðuneytisins hefur neitað að tjá sig um það hvort leyfið verði veitt.
Björgunarmenn héldu áfram að leita í rústum bæjarins Jiegu í dag. Snjókoma og kólnandi veðurfar gera aðstæður fórnarlamba jarðskjálftans enn erfiðari, en margir hafst við í tjaldbúðum eftir að heimili þeirra hrundu í skjálftanum.
Hátt í 13.000 hermenn og starfsmenn öryggissveita lögreglunnar taka þátt í björgunaraðgerðunum. Tíbetskir munkar hafa einnig unnið að björgunarstarfinu, en vonin lifir um að fleiri finnist á lífi eftir að það tókst að bjarga þremur úr rústunum í gær.
Qinghai-hérað liggur í um 4.000 metra hæð og segja stjórnvöld það hamla björgunarstarfinu. „Einn versti vandinn er háfjallaveikin sem hrjáir björgunarmenn,“ sagði Wang Zhenguo hershöfðingi. Vel flestir hermenn á jarðskjálftasvæðinu hefðu fundið fyrir a.m.k. mildum einkennum háfjallaveiki.
Björgunarsögur berast þó einnig frá svæðinu. Þannig eiga 830 nemendur og kennarar barnaskóla að hafa bjargast er aðstoðarskólastjóri fann fyrir smá skjálfta nokkrum stundum fyrir stóra skjálftann. Lét hann flytja alla úr heimavist skólans í kjölfarið að sögn kínversks dagblaðs.
16 ára stúlka á þá að hafa grafið níu meðlimi fjölskyldu sinnar með berum höndum úr rústunum eftir skjálftann að sögn Xinhua fréttastofunnar.
