Forsætisráðherra Ísraels, Benjamin Netanyahu, segir að Ísraelar hafi átt annarra úrkosta völ en að stöðva för skipalestarinnar sem reyndi að komast til Gaza á mánudag. Níu létust í árás Ísraelshers á eitt skipanna í skipalestinni. „Þetta var ekki ástarfley heldur var þetta fley fullt af hatri," sagði hann við fréttamenn í dag. 

Stjórnvöld í Tyrklandi hafa gagnrýnt árásina harðlega en þrír Tyrkir voru meðal þeirra sem féllu í árásinn. Krefst utanríkisráðherra Tyrklands þess að Ísraelar opni landamæri Gaza og segir að það sé skilyrði fyrir áframhaldandi samstarfi Tyrkja og Ísraela.

Allir útlendingarnir sem voru um borð í skipunum verða farnir frá Ísrael í kvöld.

Aðstoðarsendiherra Ísraels hjá Sameinuðu þjóðunum, Daniel Carmon, varði árás hersins á skip „Frelsisflotans“ og sagði að hermennirnir hefðu þurft að beita byssum í sjálfsvörn. Stuðningsmenn Palestínumanna í tyrkneska skipinu Mavi Marmara hefðu ráðist á hermenn með „hnífum, kylfum og öðrum vopnum“. Að sögn fjölmiðla í Ísrael náðu farþegar skipsins að minnsta kosti tveimur byssum af hermönnum.

Farþegar í skipinu neita þessu og einn þeirra sagði að hermenn hefðu beitt gúmmíkúlum, táragasi og Taser-rafbyssum um leið og þeir stigu um borð í skipið úr þyrlum.

Mannréttindaráð Sameinuðu þjóðanna í Genf hefur ákveðið að hefja sjálfstæða rannsókn á árásinni, að því er fram kemur í frétt BBC.