Öfgapresti ekki hleypt inn

Stjórnvöld í Bretlandi hafa bannað bandaríska öfgamanninum og prestinum Terry Jones að koma til Bretlands og vísa til þess að heimsókn hans gangi gegn almannahagsmunum.

Terry Jones er leiðtogi örlítils safnaðar í Flórída en Jones varð alræmdur í september sl. þegar hann tilkynnti áform um að brenna fjölmörg eintök af Kóraninum. Jones hætti síðar við bókabrennuna.

Hægri-öfgasamtökin English Defence League höfðu boðið Terry Jones að flytja ræðu á samkomu þeirra í Bretlandi. Samtökin drógu síðar boð sitt til baka en Jones hafði engu að síður í hyggju að fara til Bretlands og greindi frá því að hann hefði í hyggju að skipuleggja samkomu í London.

Talsmaður innanríkisráðuneytisins í Bretlandi benti á að ríkisstjórnin væri andvíg hvers konar öfgastefnum. Fjöldi dæma væru til um óásættanlega hegðun Terry Jones.

• 1 blogg um fréttina

Bloggað um fréttina

• Óskar Sigurðsson: Stóra Bretland óttast litla prest