Mikið verður um dýrðir á Kúbu á morgun en þá hefjast hátíðahöld vegna 85 ára afmælis fyrrverandi forseta landsins, Fidels Castro. Ekki liggur fyrir hvort afmælisbarnið lætur sjá sig í veisluglaumnum, en hann kemur sjaldan fyrir almenningssjónir og mun verja mestum hluta tíma síns í ritstörf.
Hátíðahöldin hefjast með tónleikum, þar sem valdir listamenn frá Argentínu, Síle, Paragvæ og Úrúgvæ skemmta, auk kúbverskra listamanna. Af öðrum dagskrárliðum má nefna ballettsýningu,ýmsar listsýningar og ljósmyndasýningu.
Gleðin nær hámarki á föstudag og á laugardag, en þá er afmælisdagur Castros. Þá verður galakvöld haldið í Karl Marx-leikhúsinu í Havanaborg.
Kjötkveðjuhátíðin í Havana verður haldin á sama tíma og afmælisveislan.