Bretar senda herskip til Persaflóa

Nýjasta herskipið í breska flotanum er nú á leið til Persaflóa í fyrsta verkefni sitt í skugga mikillar spennu á svæðinu þar sem Íranar hafa hótað að loka olíuflutningaleiðinni um Hormuz-sund.

Herskipið HMS Daring er útbúið felubúnaði sem kemur í veg fyrir að það sjáist á ratsjám. Ferð skipsins var skipulögð fyrir rúmu ári og er það því sagt tilviljun að það bætist við breska flotann í Persaflóa nú þegar deilur Írana og vesturveldanna eru í hámæli vegna kjarnorkuáætlunar Írana.

Íranar hafa hótað að loka sundinu ef þeir verða beittir frekari efnahagsþvingunum. Breski varnarmálaráðherrann Philip Hammond sagði í opinberri heimsókn til Washington í þessari viku að bæði Bretar og Bandaríkjamenn ætluðu að tryggja að viðbrögð þeirra við ögrunum Írana yrðu með jafnaðargeði til að gæta þess að deilurnar stigmögnuðust ekki af vangá.

• 1 blogg um fréttina

Bloggað um fréttina

• Sigurður Haraldsson: Færist nær.