Yfir 80% kvenna horfa á klám

Franskar konur horfa á klám líkt og franskir karlar ef marka má niðurstöðu nýrrar rannsóknar þar í landi. Þar kemur fram að rúmlega 80% kvenna hafa horft á klámmynd, þar af helmingurinn án maka.

Samkvæmt rannsókn IFOP sem birt var í dag höfðu 82% þeirra 579 kvenna sem tóku þátt í rannsókninni horft á klámmynd að minnsta kosti einu sinni á ævinni. Hlutfallið er hins vegar hærra meðal franskra karla þar sem 99% þeirra sem tóku þátt í rannsókninni sögðust hafa horft á klám.

Í rannsókn sem gerð var árið 2006 af sömu stofnun sögðust 73% kvenna hafa horft á klám en árið 1992 höfðu einungis 23% kvenna horft á slíkt efni, samkvæmt könnun INSERM.

Segja þeir sem unnu könnunina nú að á nokkrum árum hafi viðhorf til áhorfs á klámi breyst og það þyki nú eðlilegur hlutur að konur horfi á slíkt efni. Þetta megi rekja til netsins og þess að mun auðveldara er að nálgast efni í sjónvarpi án þess að þurfa að leita eftir því á myndbandaleigum. Ekki þurfi lengur að pukrast með áhorf á klám líkt og var áður.

62% kvennanna sögðust horfa á klám til þess að hressa upp á kynlíf sitt með maka en helmingur þeirra hafði einnig horft á klám án þess að maki væri viðstaddur.

Francois Kraus, sem stýrði rannsókn IFOP, segir að þessi breyting hafi átt sér stað á sama tíma og notkun kynlífsleikfanga hefur orðið meiri og viðurkenndari. Dregið hafi úr fordómum gagnvart sjálfsfróun kvenna og það þyki hinn eðlilegasti hlutur meðal ungra kvenna.

• 1 blogg um fréttina

Bloggað um fréttina

• Bjarni Tryggvason: Hvar seturðu mörkin?