Dæmdur vegna fjöldamorða sonarins

Þýskur karlmaður, sem er faðir sautján ára pilts sem skaut fimmtán til bana og svipti sig lífi, var í dag dæmdur í átján mánaða skilorðsbundið fangelsi fyrir manndráp og brot á byssulöggjöfinni.

Dómur yfir Jörg Kretschemer, 54 ára, var kveðinn upp í Stuttgart í dag. En sonur hans, Tim, tók skammbyssu sem var í eigu föður hans, með sér þegar hann kom í gamla skólann sinn í Winnenden norðan við Stuttgart í Suður-Þýskalandi í mars 2009. Flest fórnarlambanna voru nemendur í Albertville-iðnskólanum en Tim var fyrrverandi nemandi við skólann.

Dómurinn í dag var kveðinn upp af áfrýjunardómstól en í undirrétti hafði faðirinn verið dæmdur í 21 mánaða skilorðsbundið fangelsi. Saksóknari hafði farið fram á þyngri dóm en verjandi sagði að Kretschemer hefði tekið út sína refsingu með dauða sonarins.

Skotárásin er ein sú alvarlegasta sem orðið hefur í þýskum skóla. Hún þykir minna á skotárásina sem var gerð hinn 26. apríl 2002 í Gutenberg-menntaskólanum í Erfurt. Þá skaut nítján ára nemandi, sem hafði verið rekinn úr skólanum, 16 manns til bana áður en hann batt enda á eigið líf.

Kretschemer, sem átti fjölmörg vopn og var með leyfi fyrir þeim öllum, var svo hræddur við innbrotsþjófa að hann geymdi byssuna við hliðina á rúmi sínu þar sem sonurinn, sem glímdi við þunglyndi, tók vopnið.

• 1 blogg um fréttina

Bloggað um fréttina

• Ásgrímur Hartmannsson: Áhugavert...