Bandarískir embættismenn segja að stjórnvöld í Norður-Kóreu hafi sleppt Jeffrey Fowle en hann var einn af þremur bandarískum ríkisborgurum sem norðurkóresk stjórnvöld handtóku.
Marie Harf, talskona bandaríska utanríkisráðuneytsins, segir að Fowle sé á heimleið, en hann var leystur úr haldi í kjölfar samningaviðræðna. Þetta kemur fram á vef breska ríkisútvarpsins.
Harf segir ennfremur, að unnið sé að því að fá hina Bandaríkjamennina leysta úr haldi, þá Matthew Miller og Kenneth Bae. Þeir eru enn í Norður-Kóreu.
Bandaríkjastjórn hefur sakað stjórnvöld í N-Kóreu um að nota mennina sem peð í milliríkjadeilu.
Fowle, sem er 56 ára, kom til N-Kóreu 29. apríl sl. Hann var handtekinn í júní er hann var á leið úr landi og sakaður um að að hafa framið glæpi gegn ríkinu.
Hann var sagður hafa skilið eftir Biblíu á salerni veitingastaðar í borginni Chingjin, sem er í norðvesturhluta landsins. Fjölskylda hans hélt því fram að hann væri ekki að vinna sem trúboði í landinu, en það er glæpur samkvæmt norðurkóreskum lögum.