Lögreglan í Calais í Frakklandi biðlar til breskra yfirvalda um að grípa inn í og senda herinn yfir Ermarsundið og veita Frökkum aðstoð við að takast á við sístækkandi hóp flóttamanna sem vilja komast yfir sundið í leit að betra lífi í Bretlandi. Þetta kemur fram á vef Telegraph.

Samkvæmt heimildum Sky fréttastofunnar eru það breskir og belgískir mansalshringir sem starfa í flóttamannabúðunum í Calais. 

Kvikmyndatökulið á vegum Sky náði myndum af litlum búðum í Grande Synthe, skammt fyrir utan Dunkirk þar sem um 120 flóttamenn héldu til. Þar sáu tökumenn á vegum Sky News að minnsta kosti 13 bifreiðar á breskum númerum sem hafði verið lagt í kringum tjöld og skýli flóttamannanna. Svo virðist sem fimmtán smyglarar ráði ríkjum í búðunum. Flóttamennirnir greiða smyglurunum síðan fyrir að koma sér yfir Ermarsundið.