Alls létust 96 í loftárásum sýrlenska stjórnarhersins á bæinn Douma í gær. Þar af eru fjögur börn. Um 240 særðust í loftárásunum en bærinn er í höndum uppreisnarmanna.

Samkvæmt upplýsingum frá samtökunum Syrian Observatory for Human Rights gerði herinn að minnsta kosti tíu árásir á bæinn í gær en Douma er skammt frá höfuðborg landsins, Damaskus.

Stjórnarherinn hefur ítrekað gert loftárásir á þetta svæði en þær hafa aldrei kostað jafn marga lífið á þeim tveimur árum sem bærinn hefur verið undir stjórn uppreisnarmanna. 

Ljósmyndari AFP sem er á svæðinu segir að árásirnar í gær hafi verið þær skelfilegustu sem hann hafi upplifað frá því stríðið braust út í landinu. 

Myndir sem hafa borist frá bænum eru margar svo skelfilegar að það er ekki hægt að birta þær með fréttinni.