Myndaði börn í sturtuklefa

Fyrrverandi kennari við einkaskóla í Bristol í Bretlandi hefur nú viðurkennt að hafa notað faldar myndavélar til þess að taka óviðeigandi myndir af nemendum sínum. Hinn 53 ára gamli Jonathan Thomson-Glover var dæmdur í þriggja ára og níu mánaða fangelsi en hann játaði að hafa notað földu myndavélarnar 36 sinnum, bæði í skólanum og á heimili í Cornwall. Thomson-Glover notaði myndavélarnar í sextán ár.

Sky News segir frá þessu.

Dómarinn í málinu lýsti brotum Thomson-Glover sem „ruddalegu trúnaðarbroti“ en tók eftirsjá Thomson-Glover gilda. Bætti dómarinn því við að kennarinn væri góður maður sem léti djöfla sína stjórna honum.

„Þú berð ábyrgð á þinni eigin ógæfu og það er erfitt að vorkenna þér. Fangelsi verður þér erfitt,“ sagði dómarinn jafnframt.

Thomson-Glover var handtekinn eftir að lögreglu barst ábending um IP tölu sem notuð var til þess að niðurhala óviðeigandi myndum af börnum. Í kjölfarið greindi Thomson-glover lögreglu frá því að hann hafi sett upp myndavélar á tíu stöðum í skólanum á meðan börnin voru í fríi. Hann notaði einnig myndavél sem falin var í tösku með gati. Thomson-Glover gekk síðan um með töskuna í sturtuklefa skólans og tók myndir.

Þegar lögregla spurði hann hverju hann hafi verið að leita að með myndatökunum sagði Thomson-Glover að hann hafi aðallega verið að mynda unglingsdrengi og að hann hafi verið með áráttu fyrir þeim sem hófst á internetinu.

Lögregla fann rúmlega 300 spólur og 2.500 klukkustundir af upptökum af börnum á heimili Thomson-Glover. Rúmlega 130 nemendur sáust á upptökunum.

Að sögn saksóknara í málinu báru foreldrar og nemendur í skólanum mikla virðingu fyrir Thomson-Glover og var litið á hann sem „fullkominn fagmann“.

Verjandi hans sagði kviðdómnum að Thomson-Glover sæi eftir gjörðum sínum og að hann vildi biðjast opinberlega afsökunar. Hann sagði jafnframt að skjólstæðingur hans gerði ekki ráð fyrir að honum yrði fyrirgefið.

• Blogga um frétt