Ráðist var á hótel í bænum Hurghada í Egyptalandi í dag en bærinn er vinsæll ferðamannastaður við Rauða hafið. Samkvæmt frétt AFP særðust þrír erlendir ferðamenn í árásinni . Tveir Austurríkismenn og Svíi.
Fram kemur á fréttavef breska ríkisútvarpsins BBC að árásarmennirnir hafi komið sjóleiðina að bænum og hafið árásina í kjölfarið. Egypskar öryggissveitir hafi stöðvað árásina og fellt einn árásarmanninn. Yfirvöld hafa girt svæðið af segir í fréttinni. BBC sagði upphaflega að tveir hefðu særst í árásinni, Dani og Þjóðverji, en hefur nú breytt frétt sinni á þann veg að misvísandi fréttir berist um þjóðerni ferðamannanna sem særðust í árásinni.
Þá kemur fram bæði í frétt BBC og AFP að ekki sé ljóst hvort árásarmennirnir hafi verið vopnaðir byssum eða hnífum en BBC hafði upphaflega sagt að um byssur hafi verið að ræða.