Að minnsta kosti þrettán létu lífið í tvöfaldri sjálfsmorðssprengingu í Mogadishu, höfuðborg Sómalíu, í dag. Sprengjurnar sprungu nálægt bækistöðvum Sameinuðu þjóðanna og Afríkubandalaginu, skammt frá alþjóðaflugvelli borgarinnar.
Sprengjurnar sprungu um klukkan 9 að staðartíma í morgun.
Fyrri frétt mbl.is: Sprengingar í Mogadishu
Hryðjuverkasamtökin Al-Shabaab lýstu yfir ábyrgð á ódæðinu en þau starfa með Al-Qaeda.
Al-Shabaab hefur lýst yfir ábyrgð á fjölmörgum árásum í Sómalíu og Kenía síðustu misseri en markmið þeirra er að koma ríkisstjórn Sómalíu frá.
22.000 hermenn starfa í bækistöð Afríkubandalagsins í Mogadishu. Voru þeir sendir til Sómalíu árið 2007 til þess að berjast gegn Al-Shabaab.