Hafa ekki ráð á dömubindum

Skólastúlkur á Nýja-Sjálandi hafa verið að skrópa í skólanum af því að þær hafa ekki ráð á að kaupa dömubindi og neyðast til að nota tuskur eða dagblöð þeirra í stað. Á síðustu þremur mánuðum dreifðu góðgerðarsamtökin KidsCan 4.000 dömubindum til 500 skóla, eftir að þau fengu styrk til verkefnsins frá ríkinu.

Þar sem KidsCan kaupa dömubindin í miklu magni fá þau dömubindapakkann á 1 nýsjálenskan dal í stað 4-8 dala. Vörur á borð við dömubindi og túrtappa eru skattlagðar á Nýja-Sjálandi.

Að sögn Vaughans Couillaults, skólastjóra Papatoetoe-menntaskólans í suðurhluta Auckland, er það áhyggjuefni hversu margir af 700 kvenkyns nemendum skólans, sem koma frá efnaminni fjölskyldum, hafa ekki aðgang að hreinlætisvörum þegar þær fara á blæðingar.

KidsCan hófu að sjá skólanum fyrir dömubindum á þessu ári, en fyrir þann tíma fór starfsfólk skólans reglulega út í matvöruverslun og keypti bindi en stúlkurnar voru svo rukkaðar um 50 sent til að fá upp í kostnað. Að sögn Couillaults hafa kennarar við aðra skóla keypt dömubindi fyrir nemendur sína á eigin kostnað.

Sarah Kull, hjúkrunarfræðingur við Papatoetoe, segir að eftir að 50 senta gjaldið var lagt niður leiti 10-15 stúlkur til hennar dags daglega af því þær vantar hreinlætisvörur. Sumar vantar eitthvað í eitt skipti, en aðrar vantar fyrir allt tímabilið sem þær eru á blæðingum. Hún telur fjöldann sem raunverulega skortir ráð til að kaupa hreinlætisvörur mun meiri, en stúlkurnar upplifi það sem skömm að leita aðstoðar.

Ítarlega frétt um málið má finna hjá Guardian.

• Blogga um frétt