Öryggisráð Sameinuðu þjóðanna samþykkti í gærkvöldi að senda fjögur þúsund hermenn til Juba, höfuðborgar Suður-Súdans. Stjórnvöld í landinu hafa lagst gegn áformunum.

Tólf þúsund friðargæsluliðar á vegum Sameinuðu þjóðanna eru þegar í landinu.

Í ályktun öryggisráðsins segir að ef stjórnvöld í Suður-Súdan komi í veg fyrir að herliðið komist til landsins, þá verði bann lagt við vopnasölu í landinu.

Til mikilla átaka kom á milli ríkjandi afla í Suður-Súdan í júlímánuði, tæpu ári eftir að skrifað var undir friðarsamkomulag, en talið er að hundruð manna hafi látið lífið í átökunum.

Friðargæsluliðum Sameinuðu þjóðanna hefur mistekist að tryggja öryggi almennra borgara, en yfir 35 þúsund manns hafa flúið til bækistöðva þeirra í Juba.

Yfir hundrað þúsund manns hafa jafnframt flúið frá landinu og til nágrannaríkja á undanförnum vikum, að sögn flóttamannahjálpar Sameinuðu þjóðanna.

Markmið herliðsins verður að tryggja öryggi almennra borgara í Suður-Súdan og eins verja bækistöðvar Sameinuðu þjóðanna í Juba.

Frétt BBC

Tengdar fréttir

Suður-Súdan

Þaggað niður og falið í skugga skammar

• Marel styrkir Rauða krossinn um 162 milljónir
• Nauðguðu 150 konum og stúlkum
• Milljónir líða enn sult
• Dæmdir fyrir að nauðga hjálparstarfsmönnum

» Fleiri tengdar fréttir

• Blogga um frétt