Að minnsta kosti 29 drukknuðu er bát hvolfdi undan ströndum Egyptalands í dag. Um borð í bátnum voru um 600 farþegar. Um 150 þeirra hefur verið bjargað úr sjónum samkvæmt frétt BBC.
Sífellt fleiri sem neyðast til að flýja heimalönd sín koma nú til Egyptalands og flýja þaðan til Evrópu.
Í bátnum sem hvolfdi í dag voru m.a. Egyptar, Súdanar og Sýrlendingar. Ekki er ljóst hver áfangastaður fólksins átti að vera en líklegt er talið að það hafi ætlað að koma að landi á Ítalíu.