Forsvarsmenn Facebook hafa nú beðist afsökunar á að hafa fjarlægt myndband sænska krabbameinsfélagsins Cancerfonden, sem vekja á athygli á hættunni á brjóstakrabba.
Um er að ræða teiknimynd sem sýndi konu með hringlaga brjóst og var myndbandinu ætlað að útskýra hvernig konur geti skoðað brjóst sín og leitað að hnútum sem gætu reynst vera æxli. Myndbandið var talið „dónalegt“ að mati samfélagsmiðilsins.
Frétt mbl.is: Facebook vill ekki brjóstakrabbamyndband
Í yfirlýsingu sem Facebook sendi fréttavef BBC er sagt að birting myndbandsins hafi nú verið heimiluð.
„Okkur þykir þetta mjög leitt, teymi okkar fer í gegnum milljónir auglýsinga í viku hverri og stöku sinnum eru auglýsingar ranglega bannaðar,“ segir í yfirlýsingunni.
„Þetta myndband brýtur ekki í bága við auglýsingastefnu okkar. Við biðjumst afsökunar á mistökunum og höfum tilkynnt auglýsandanum að við samþykkjum auglýsinguna.“
Cancerfonden hafði áður margreynt að fá svör frá forsvarsmönnum Facebook og í opnu bréfi til samfélagsmiðilsins sögðu samtökin herferðina ekki eiga að vera dónalega. Þau hefðu enn fremur fundið lausn á vandanum – að breyta hringjunum tveimur sem táknuðu brjóstin í bleika ferninga.
Sambærilegt myndefni hefur verið fjarlægt af Facebook áður að sögn BBC, m.a. mynd af brjóstamyndatöku og önnur sem sýndi geirvörtur vera húðflúraðar á konu sem brjóstið hafði verið tekið af.
Ekki er langt síðan sú ákvörðun Facebook að eyða þekktri fréttaljósmynd af nakinni víetnamskri stúlku, sem flýr undan napalm-sprengjum, úr færslu Ernu Solberg, forsætisráðherra Noregs, vakti harða gagnrýni. Facebook sagði myndina brjóta gegn reglum fyrirtækisins en dró þá ákvörðun sína síðar til baka.