Donald Trump, nýkjörinn forseti Bandaríkjanna, segir Ísrael vera „leiðarljós vonar fyrir óteljandi marga“, í fyrstu opinberu skilaboðum sínum til þjóðarinnar síðan hann náði kjöri fyrr í vikunni.
„Ísrael og Bandaríkin deila með sér mörgum svipuðum gildum, þar á meðal málfrelsi, trúfrelsi og mikilvægi þess að skapa tækifæri fyrir alla borgara sína til að uppfylla drauma sína,“ sagði Trump í skilaboðum sem voru birt í dagblaðinu Israel Hayom.
„Ísrael er eina sanna lýðræðisríkið og málsvari mannréttinda í Mið-Austurlöndum og leiðarljós vonar fyrir óteljandi marga,“ sagði Trump.
Hann vonaðist jafnframt til að ríkisstjórn hans mundi leika „mikilvægt hlutverk í að hjálpa deiluaðilum að öðlast réttlátan og viðvarandi frið“.
Frakkar hafa óskað eftir því að alþjóðleg ráðstefna verði haldin til að ræða frið í Mið-Austurlöndum. Ísraelar segja að slíkar viðræður yrðu að fara fram eingöngu á milli Ísraela og Palestínumanna.
Benjamin Netanyahu, forsætisráðherra Ísraels, var á meðal fyrstu þjóðarleiðtoganna sem Trump ræddi við eftir að hann var kjörinn forseti.
Ísraelskir hægrimenn hafa fangað sigri Trumps í forsetakosningunum og segja hann skapa tækifæri til að auka yfirráð þjóðarinnar yfir Vesturbakkanum.