Elísabet Englandsdrottning mun ekki mæta í messu á nýársdag vegna veikinda. Drottningin er kvefuð en hún missti af jóladagsmessunni af sömu sökum.
Drottningin og Filippus prins þurftu að ferðast með þyrlu til heimilis þeirra í Sandringham 22. desember vegna þess að þau voru bæði of slöpp til þess að fara með lest og hefur drottningin verið slöpp síðan.
Talsmaður Buchkingham-hallar sagði að drottningin væri enn að ná sér. Hún hefur verið með kvef í meira en viku en talið er að hún sé öll að koma til.
Um daginn var greint frá því að skyldum drottningarinnar yrði fækkað töluvert en þá hvarf hún frá hlutverki sínu sem verndari 25 breskra samtaka. Elísabet, sem varð níræð á árinu, og hinn 95 ára gamli Filippus tóku á móti gestum í Buckingham-höll í vikunni fyrir jól þar sem árlegur jólahádegisverður fór fram.