Donald Trump forseti Bandaríkjanna sakar fjölmiðla um óheiðarleika varðandi myndbirtingar af innsetningarathöfninni á föstudag. Telur Trump að fjölmiðlar sýni ekki rétta mynd af fjöldanum en mun fleiri tóku þátt í mótmælum gegn Trump í gær en fylgdust með innsetningunni.

Trump segir að mannfjöldinn hafi náð allt að George Washington-minnismerkinu (Nálinni) þegar hann var settur inn í embætti forseta í þinghúsinu. Aldrei hafi fleiri fylgst með embættistöku forseta Bandaríkjanna, segir fjölmiðlafulltrúi forsetaembættisins.

Milljónir tóku þátt í mótmælagöngum út um allan heim í gær þar sem stefnu Trump var mótmælt. Í höfuðborg Bandaríkjanna er talið að hálf milljón manna hafi tekið þátt. Það eru að mati flestra mun fleiri en fylgdust með embættistökunni.

Markmið göngunnar var að benda á réttindi kvenna en margir telja að hætta sé á að lítið fari fyrir þeim réttindum með nýjum ráðamönnum í Washington.

Trump minntist ekkert á mótmælin þegar hann heimsótti höfuðstöðvar leyniþjónustunnar í Langley, Virginíu, en lét þess í stað fjölmiðla heyra það. Hann sakar fjölmiðla um að reyna að koma á illdeilum milli hans og öryggisstofnana ríkisins og sagði fréttamenn vera meðal þeirra óheiðarlegustu á jörðinni.

Ljósmyndir og myndskeið sem sýnd hafi verið í fjölmiðlum af embættistökunni gefi ekki rétta mynd og hann teldi að um 1,5 milljónir manna hafi fylgst með en fjölmiðlar segi að þeir hafi verið færri en 250 þúsund talsins. 

Frétt BBC