Kushner býður sig fram til yfirheyrslu
Setja bókamerki
Jared Kushner, ráðgjafi Donald Trump og tengdasonur, hefur boðist til þess að koma fram fyrir leyniþjónustunefnd bandaríska þingsins sem hluti af rannsókn hennar á tengslum Trump við Rússa.
Talsmaður Hvíta hússins greindi frá þessu í dag. Kushner starfaði sem helsti tengiliður erlendra stjórnvalda og embættismanna við forsetaframboð Trump. „Í ljósi þess hlutverks hefur hann boðið sig fram til þess að ræða við nefndina en á eftir að fá svar,“ sagði talsmaðurinn.
CNN greindi jafnframt frá því fyrr í dag að Kushner væri sérstaklega til rannsóknar af nefndinni út af fyrrnefndum tengslum.
Greint var frá rannsókn bandarísku alríkislögreglunnar á tengslum helstu ráðgjafa Trump við Rússa í síðustu viku. Þingnefndin hefur byrjað að yfirheyra vitni og verður fyrsta opinbera yfirheyrslan á fimmtudaginn.
Orðrómur hefur verið um tengsl Trump og samstarfsmanna hans við stjórnvöld í Rússlandi allt frá því í kosningabaráttunni.
Í janúar greindu bandarískar leyniþjónustustofnanir frá því að tölvuþrjótar sem störfuðu fyrir rússnesk yfirvöld hafi brotist inn i tölvupóstkerfi háttsettra demókrata og birt tölvupósta sem komu sér illa fyrir kosningabaráttu Hillary Clinton, keppinaut Trump í kosningabaráttunni.
Ríkisstjórn Trump hefur alltaf haldið því fram að engar sannanir væru fyrir meintu leynimakki forsetans.
„Það eru engar sannanir fyrir leynimakki á milli Trump og Rússlands og það eru engar sannanir fyrir neinu hneyksli í tengslum við Trump og Rússa,“ sagði háttsettur embættismaður í yfirlýsingu fyrr í mánuðinum.
Breytingar á skipulagi fréttadeildar RÚV
Skaut sex sinnum að feðginum á aðfangadagskvöld
Strand skemmtiferðaskips kallar á erlenda aðstoð
Krefjast stöðvunar framkvæmda
Þyngri refsing fyrir að nauðga stjúpdóttur æskuvinar
Banna mengandi búnað sem leyfður er á Íslandi
Bergnuminn í Hvalfirði