Tónlistargoðsögnin Bob Dylan mun hitta sænsku Nóbelsakademíuna um helgina og taka þar á móti bókmenntaverðlaunum Nóbels sem hann hlaut á síðasta ári en hefur raldrei tekið formlega á móti.
„Góðu fréttirnar eru þær að Nóbelsakademían og Bob Dylan hafa ákveðið að hittast um helgina. Akademían mun síðan afhenda Dylan verðlaunaskjalið og Nóbel-medalíuna og óska honum til hamingju með bókmenntaverðlaun Nóbels,“ skrifar Sara Danius ritari sænsku akademíunnar í bloggfærslu í dag.
Dylan ætlar að halda tónleika tvenna tónleika í Stokkhólmi, á laugardaginn og sunnudaginn og svo í Lundi 9. apríl. Orðrómur hafði verið uppi um að hann muni jafnvel flytja erindi sitt í Svíþjóðarheimsókninni en samkvæmt BBC er sú ekki raunin heldur mun Dylan senda frá sér upptöku af erindi.
Fyrr í vikunni varaði akademían Dylan við því að fresturinn til þess að sækja verðalaunaféð renni út 10. júní. Dylan hlaut að launum átta milljónir sænskra króna, sem jafngildir 100 milljónum íslenskra króna fyrir að vinna verðlaunin. Til þess að geta fengið peningana afhenta þarf handhafi Nóbelsverðlaunanna að flytja fyrirlestur innan sex mánaða frá formlegri afhendingu verðlaunanna 10. desember, daginn sem Nóbelsverðlaunin eru formlega afhent á fæðingardegi Alfreðs Nóbel.