Þáttur Bill O’Reilly, sem er vinsælasti þátturinn á sjónvarpsstöðinni Fox News, á undir högg að sækja á auglýsingamarkaði þar sem tólf fyrirtæki hafa hætt að auglýsa í þættinum eftir að hann var sakaður um kynferðislega áreitni í garð fimm kvenna.
Um er að ræða bílaframleiðendurna Mercedes-Benz, Hyundai, BMW og Mitsubishi auk T Rowe Price, Credit Karma, Allstate, Sanofi, GlaxoSmithKline, Ainsworth, Untuckit og Constant Contact.
Fyrirtækin kynntu ákvörðun sína í kjölfar fréttar New York Times um helgina um að O’Reilly og starfsmaður hans hefðu greitt fimm konum 13 milljónir Bandaríkjadala í sátt í máli um óviðeigandi hegðun hans í garð kvennanna.
Þetta kemur fram í frétt Guardian.